Nyuma yo kwaduka kw’icyorezo cya covid-19, isi yose imaze igihe kinini itegereje insinzi idasubirwaho yacyo, ahanini kubera ingaruka nyinshi iki cyorezo cyateye. Urukingo rwa covid-19 ni kimwe mu bisubizo bishoboka by’iki cyorezo nk’uko byatangajwe n’inzobere mu buzima zitandukanye.

N’ubwo hari benshi bifuza uru rukingo mu isi, mu gihugu cya Kenya ihuriro ry’abaganga b’abakristu gatolika (Catholic Doctors association) ryamaganiye kure uru rukingo rwa covid-19.

Aba baganga basobanura ko urukingo rwa covid-19 atari ngombwa ahubwo ko gukoresha uburyo bwo kwivura gakondo bizwi nko kwiyuka byafasha kugabanya no gukiza iyi ndwara ya covid-19, byaba ngombwa hakaba hakitabazwa imiti nka hydroxychloroquine, ivermectin iyi miti ikaba itaremejwe n’umuryango w’abibumbye wita k’ubuzima (WHO) ko yavura bidasubirwaho icyorezo cya covid-19.

Amakuru atangazwa n’ubuyobozi bwa Kiliziya gatolika ya Kenya, nk’uko tubikesha ikinyamakuru BBC, ni uko Kiliziya gatolika yitandukanyije ku mugaragaro n’iritsinda ry’abaganga.

Mu minsi ishize abayobozi bakomeye bagize icyo batangaza k’urukingo rwa covid-19, harimo n’umuyobozi wa Kiliziya gatolika ku isi yose Papa Francis aho yatangaje ko abantu batagomba kuganzwa n’ubwoba bwo kwiteresha uru rukingo kuko rwizewe rwose.

Uhagarariye WHO muri kenya yavuze ko ibyatangajwe n’abo baganga ko ari ibinyoma, aho yasobanuye ko urukingo rwemejwe n’inzengo z’abahanga z’itandukanye mbere y’uko rwemezwa n’umuryango w’abibumbye ishami ryita k’ubuzima OMS.

Kuri uyu wa 05 werurwe 2021, umugabane w’Africa watangiye gukingira abaturage bawo hakoreshejwe inkingo zo muri gahunda ya covax. Iyi gahunda y’inkingo za covax by’umwihariko yatangiriye mu gihugu cya Kenya, Urwanda ndetse no muri Nigeriya ahibanzwe kunzego z’ubuzima.

Views: 992
Sangiza abandi