Icyo gihe ubwami bwo mu ijuru buzagereranywa n‘abakobwa cumi bajyanye amatabaza yabo, bajya gusanganira umukwe. Ariko muri abo cumi, abatanu bari abapfu, abandi batanu bari abanyabwenge. Abapfu bajyanye amatabaza yabo ntibajyana n‘amavuta, ariko abanyabwenge bo bajyana amavuta mu mperezo zabo hamwe n‘amatabaza yabo. Umukwe atinze bose barahunikira, barasinzira.Matayo 25:1-5

Abo bantu b‘amaharakubiri bari bategereje bagereranya amatsinda abiri y‘abavuga ko bategereje kuza kw‘Umukiza wabo. Bitwa abari bitewe n‘uko babwiriza kwizera kuboneye. Amatabaza yabo agereranya Ijambo ry‘Imana amavuta nayo agashushanya imico.

Mu mugani wo muri Matayo 22 na ho havuzwe ikindi kigereranyo cy‘ubukwe, kandi isuzumarubanza bigaragara neza ko rizakorwa mbere y‘uko ibirori by‘ubukwe bitangira (mbere yo kugaruka kwa yesu ). Mbere y‘uko ubukwe butangira umwami yinjiye mu nzu y‘ibirori gusuzuma abatumirwa ngo arebe ko bose birimbishije umwambaro w‘ubukwe, ikanzu itagira ikizinga ari yo mico yogejwe kandi ikejeshwa amaraso y‘umwana w‘intama.

Matayo 22:11; Ibyahishuwe 7:14. Aha niko natwe abatuye isi turimo kunyurwamo uwiteka atoranya ubwoko bwe budafite inenge kandi abakurikiza amategeko ye nibo bonyine bari gutoranywa ngo bazatahe ubukwe bw’ umwana w’ Imana mbese nawe uri muri uwo mubare tekereza neza ibyo ukora niba bihuza nicyo ijambo ry’ Imana rivuga ariko haracyari ibyiringiro ko nawe uyu munsi waba ari uwawe kuko yesu kristo aracyicaye ku ntebe y’ imbabazi ashaka wowe nanjye ngo tumwegurire imibereho yacu atubashishe kumurikira iyisi y’ umwijima w’icuraburindi umwanzi satani yigaruriye ashaka ko inyoko muntu yazarimbuka nyamara umuburo waratanzwe kuriburi wese wifuza kuwakira.

Umuntu wese wasanzwe adashyitse yajugunywe hanze, ariko abo isuzuma ryasanze bambaye ikanzu y‘ubukwe bemewe n‘Imana bahabwa umwanya mu bwami bwayo kandi bahabwa kwicara ku ntebe yayo. Uyu murimo w‘isuzuma ry‘imico no kumenya abiteguriye ubwami bw‘Imana, ni wa murimo w‘urubanza kagenzuzi, ni isozwa ry‘umurimo Yesu akorera mu buturo bwo mu ijuru.

Igihe umurimo w‘igenzura uzaba urangiye, ubwo imanza z’abantu bo mu bihe byose bavuze ko ari abayoboke ba Kristo zizaba zimaze gusuzumwa no gufatirwa umwanzuro, icyo gihe ni bwo igihe cy’imbabazi kizaba kirangiye, kandi urugi rw‘imbabazi ruzakingwa. Bityo iyi nteruro ngufi ngo: uwera nagumye yere n’ uwanduye agumye yandure.

Ntibyatinze umukwe yaraje maze abakobwa bose bitegura kujya kwakira umukwe nyamara muribo harimo abapfapfa batari bitwaje amavuta mu nterezo zabo nuko  abakobwa b‘abapfu batangira basabiriza amavuta maze ntibayabona igihe bayasabaga. Iki ni ikigereranyo cya bamwe batiteguye ngo bakuze imico izababashisha guhangana n‘igihe cy‘akaga. Bisa neza nko kujya ku baturanyi babo maze bakababwira bati:  muduhe ku mico yanyu nibitaba bityo tuzarimbuka. Nyamara  Abanyabwenge ntibashoboraga gushyira amavuta yabo mu matabaza y‘abakobwa b‘abapfu yazimaga.

Imico ntitizwa, ntigurwa kandi ntigurishwa iraharanirwa. Imana yahaye buri wese amahirwe yo kugera ku gukiranuka kwa Kristo aha rero niko natwe abategereje kugaruka kwa yesu  harimo bamwe bicaye mu itorero bibwirako bejejwe nyamara yesu abatunguye bashyiirwa hanze y’urugo kuko ari ingwiza murongo abo nibo bari gushyushya intebe, ibigande mu mitima, birirwa banegurana mu rusengero nyamara abababona bakavugako ari intungane nyamara imbere muribo baraboze ni byabisebe binuka umuhanuzi w’ Imana yesaya yavuze bitigeze bikandwa nyamara warebera inyuma ukabonako igisebe cyacyize kandi imbere ari umufunzo umuhanuzi w’ uwiteka yatanze Inama ikomeye avugako igisebe gikwiye gutonekwa kigakandwa maze amashyira akavamo igisebe kikagaragara kikozwa maze kikabona gukira.

Yooo mbega ibyakurikiyeho  ngabo Bagiye kugura amavuta , umukwe araza, abari biteguye binjirana na we mu bukwe, urugi rurakingwa. Matayo , uku rero niko no kugaruka kwa yesu bizagenda hari bamwe bicaye mw’itorero bibwirako ko bategereje kuza kwa yesu kandi ko bujujuje ibisabwa byose ngo basanganire umukiza nyamara bazasanga bibeshya kuko nta mubano uhamye bagiranye na yesu ngo abahishurire ibya mwuka were uyobora abemeye kristo kugera ku rugero rushyitse.

Nshuti muvandimwe he kugira uwigana urugero rw‘abakobwa b‘abapfu ngo yibwire ko azagubwa neza niyidamararira maze igihe cy‘akaga kikamusanga atarategura imico izamubashisha guhangana na cyo. Bizaba ari impitagihe gushaka gukiranuka kwa Kristo igihe abararikwa bazaba bari kwinjizwa mu cyumba cy‘ubukwe kandi bagasuzumwa. Iki ni cyo gihe cyo kwambara gukiranuka kwa Kristo; ari wo mwambaro w‘ubukwe uzakubashisha kwicara ku meza y‘ubukwe bw‘umwana w‘intama, Ntihakagire usubika umunsi wo kwitegura kugira ngo ijwi ritavunga ngo nimusohoke tumusanganire maze mugasangwa mumeze nk‘abakobwa b‘abapfu nta mavuta mu mperezo y‘amavuta z‘amatara yanyu.

Reference

Uwifuzwa ibihe byose by Ellen G white

Bibiliya yera

Views: 648
Sangiza abandi